මොවුන් ඉවත් කර ඊලගට එන විසඳුම කුමක්ද?

Maroon Hats Analyzers

ලංකාවේ වත්මන් දේශපාලන අර්බූදය ව්‍යවස්ථානුකූලව විසඳාගත හැකි පහසුම ක්‍රමය

අප රටේ දැනට උද්ගතවී තිබෙන ආර්ථික අර්බූදයට මූලිකම හේතුව ලෙස දකින්නේ අවශ්‍ය අවස්ථාවේදී නිවැරදි තීන්දු තීරන නොගෙන මග හැර සිටීමයි! එනිසා මෙම අර්බූදය විසඳිය හැකි වටිනා අවස්ථා කිහිපයක්ම වත්මන් පාලනය විසින් හිතා මතා නොසලකා හැර ඇත. මෙයට ඍජුවම වගකිව යුත්තේ අප රටේ ජනපති සහ පැවති කැබිනට් මණ්ඩලයත්, ඒ හා බැඳුනු රාජ්‍ය නිලදාරීන් බව නොරහසකි. එපමණක් නොව, 1974 සිට ගොඩනැගුනු වැරදි දේශපාලන රටාවත්, එනයින් පාර්ලිමෙන්තුව නියෝජනය කල මන්ත්‍රීවරුන්ගේ නොමනා ක්‍රියා කලාපයන් මෙම තත්වය වඩා තීව්‍ර කර ඇත.

මේ තත්වය හොදින් තේරුම් ගත් වත්මන් තරුණ ප්‍රජාව නැගී සිටින්නේ මෙම විධායකය සහ ව්‍යවස්ථාදායකය ගෙන යන දූශිත දේශපාලන රටාවට සහ එනයින් පැන නැගුනු ආර්ථික අර්බූදයන්ට එරෙහිවයි.

අප තරුනයන් සිදු කරන මේ ඉල්ලීම් සර්ව සාධාරන බව අප පමණක් නොව, ආණ්ඩුවේ මන්ත්‍රීවරුන් පවා පිලිගෙන ඇත. මෙම අරගලයට විසඳුමක් නැතැයි ඇතැමුන් ගෙන යන ප්‍රචාර හිස් පුහු තර්කයකි. ඔවුන්ගේ ඉල්ලිම් සහ ඒවාට ව්‍යාවස්තාවේම පවතින විසඳුම් මෙසේ සිහි කරනු කැමැත්තෙමි.

පලමුව ඔවුන් සිදුකල යුත්තේ දැනට පාර්ලිමේන්තුවෙන් පිටත සිටින ඒ ඒ ක්ෂේත්‍රයේ දක්ශයින් හදුනා ගැනීමයි. ඔවුන් 20-25ක පමන පිරිස (විධායක මඩුල්ල) පාර්ලිමේන්තුවට ජාතික ලැයිස්තුවේ මන්ත්‍රීවරු ලෙස ගෙන ආ යුතුයි. මෙහිදී වත්මන් පාර්ලිමෙන්තුවේ ජාතික ලැයිස්තුවේ 29 දෙනාගෙන් මන්ත්‍රීවරුන් කිහිපදෙනෙකුට ඉල්ලා අස් වීමට සිදුවේ.(ජයන්ත කැටගොඩ ඉල්ලා අස් වී බැසිල් රාජපක්ෂ පත් වූ ආකාරයට). ජාතික ලැයිස්තුවේ ව්‍යවස්ථානුකූල නිර්මානය වී ඇත්තේ විවිධ ක්ෂේත්‍රවල ප්‍රවීනයින්, දක්ෂයින් පාර්ලිමේන්තුවට ගෙන ඒමටයි.

ප්‍රශ්නය : ජනාදිපති ධූරයෙන් සමුගත යුතුයි.
ක්‍රමය : ඔහුට තමා ධූරයෙන් ඉල්ලා අස් වන බවට කතානායක තුමාට දැනුම් දීමක් මගින් සිදු කල හැක.
විසදුම : විධායක මඩුල්ලෙන් පාර්ලිමේන්තුවට ආ සුදුසුම පුද්ගලයාට මෙම තනතුර ලබා දිය යුතුයි. පාර්ලිමේන්තුවේ බහුතර කැමත්ත මත මෙය සිදුකල හැක.

ප්‍රශ්නය : ආර්තික සහන ලබා දීම.
විසදුම : විධායක මඩුල්ලෙන් නව කැබිනට මන්ඩලයක් පත් කර නව අයවැයක් ඉදිරිපත් කිරීම මගින් වඩා ප්‍රායෝගික හා ගැලපෙන ආර්ථික ප්‍රතිසංස්කරණ ක්‍රියාත්මක කල හැක.

මෙම විධායක මඩුල්ලට නිශ්චිත ඉලක්ක ලබා දී , ඔවුන්ගේ කාර්යයන් පහසු කිරීමට ජනතා චන්දයෙන් තේරීපත් වූ මන්ත්‍රීවරු උදව් කල යුතුයි.
(ආර්ථික වර්ධනය, ස්වාධීන විගණනය, රට ස්ථාවර කිරීම, ණය කලමණාකරනය…)
විධායක මඩුල්ලට ලබා දුන් ඉලක්ක සපුරා ගත් විගස , අපට පාර්ලිමේන්තු මැතිවරණයකට පිවිසීම සිදු කල හැක.

මෙම ක්‍රියාමාර්ගයන් පහසුවෙන්ම පාර්ලිමේන්තුව තුලදීම දින 2-3ක් තුල ක්‍රියාත්මක කල හැකි අතර, තවමත් පාර්ලිමේන්තු බලයට ලොල් වූ අය සහ ඔවුන්ගේ අන්ධ අනුගාමිකයින් ගෙනියන “මොවුන් ඉවත් කර ඊලගට එන විසඳුම කුමක්ද?“, “විසඳුමක් නැත“, යන්න පුහු තර්කයකි.